有伊個人獨有的哲學觀佮美感經驗。--《鹽酸草》

我的花園內底無驕艷的玫瑰，無雅氣的蓮花池。一支草kâm一點毋甘，日頭炤著，閃閃爍爍。
我的大海頂頭無高貴的郵輪，無五彩的光影。一粒螺仔kâm一屑仔疼惜，海風吹來，有神仙的氣味。
《鹽酸草》是詩人王羅蜜多頭一本臺語詩集，詩冊裡有85首散文詩佮40首分行詩。作品多數位報紙、詩刊、面冊抾倒出來，另外有一寡得過獎的詩。
用母語思考，行過土生土長的記持，每一支草每一粒螺仔，攏有伊的意味。有時無張持ànn落去，嘛會抾著一首詩。

立即訂購《鹽酸草》

內容試閱

〈春天的穎〉

春天逐跡攏是穎，有的對壁角旋出來，有的對石頭縫piak出來，有的對樹頭pok出來，閣有的uì鬢邊軁出來。

我掛老歲仔目鏡一跡一跡巡視，發覺啊，逐家的穎攏青青翠翠幼咪咪，按怎干但阮的殕殕兼粗絲，閣帶鳥屎色。

急診的醫生用超音波、斷層掃描檢查，哎呀，汝的頭殼內一群鳥仔飛來飛去，有時唸歌詩，有時講故事，莫怪汝逐瞑ià-ià捙，目睭眨眨nih。

醫生出手掀我的天靈蓋欲共鳥仔喊走。俺娘喂！我驚一趒開門傱出去，看著春天的日頭已經佇雲邊出一穎。

註︰
穎︰ínn，幼芽。
軁，nǹg，鑽過。
ià-ià捙︰ià-ià tshia，翻來覆去。
喊，hiàm。
驚一趒，kiann tsi̍t tiô，嚇一跳。

　　　　　　（2017.3.19於臺灣詩路詩歌音樂會朗誦）

───

〈新春的囡仔嬰〉

春天的亂鐘仔giang giang叫，畫室頭前的鹽酸草，一支一支醒起來矣。
佇甜蜜的眠夢中孵出來的囡仔嬰，好奇的目睭也一蕊一蕊褫開。

怹第一眼看著的世界，是桂花阿姨妖嬌美麗閣兼有hiù芳水的身軀。

註︰
囡仔嬰︰gín-á-enn，嬰孩。

　　　　　　（2016.3.20於臺灣詩路詩歌音樂會朗誦）

───

〈幸運草〉

厝頭前小花園，我從來毋知伊有幾坪。只知影生活中，桂花一直大，玫瑰時常剪，韓國草焦去就愛換。

彼日佇思慕微微的雨濛中，開門想欲拔去記持的雜草，突然噗一下，一支黃色小雨傘拍開我心內的門窗。

小雨繼續濛濛，翩翩蝴蝶飛過來，我佮愛人佇校園裡的隱蔽角落，尋找四葉的幸運草，規目睭攏是愛情的詩，滿耳孔全是青春的句。

現在，我已經真珍惜自然土生的鹽酸草，無閣補種韓國草，就按呢黃色的小花蕊一工一工盛開，幸運也一工一工成長。我想，毋管三葉或是四葉，這個花園已經漸漸大漢了。

了解更多請至秀威網路書店

至Google play 購買電子書