呈現目前客語現代詩的書寫風景。--《落泥--臺灣客語詩選》

2016/4/13  
  
本站分類:創作

呈現目前客語現代詩的書寫風景。--《落泥--臺灣客語詩選》

收集二十四位客語書寫現代詩作者──杜潘芳格、羅浪、葉日松、范文芳、彭欽清、曾貴海、黃卓權、羅肇錦、利玉芳、陳寧貴、陳黎、張捷明、黃子堯、江昀、黃有富、羅思容、彭歲玲、張芳慈、葉國居、劉正偉、劉慧真、邱一帆、羅秀玲、彭瑜亮,跨足老、中、青三代,每人以一至六首不等的作品呈現目前客語現代詩的書寫風景。探索各自深入土地關懷客家的豐碩成果,宛如生根番薯,落泥更護土。

 

內容試閱

【出席】
該當時
喉涎頭已像卡著一粒火炭个樣
該當時
緊顫个身體無法度企好勢
該當時
故鄉人分我做膽
準講無聲乜愛講出自家个話
這斯係正經出席咧
有兜人聽得識
有兜人毋識聽過
過有兜人無麼認同
毋過 我決定分厥等一個機會

【可比講你問我心肝肚个該首詩】
可比講你問我心肝肚个該首詩
玄玄風斯會愐著
一半下大一半下細个大甲河水
還有盤過大雪山个白雲
哦 我所罣吊个你
秋分時節芒冬花排出轉屋家个路
你敢知得寒天打霜个竹圃有幾堅韌呢
可比講你問我心肝肚个該首詩
三不二時斯會試著毋知哪位疾
想愛食山林肚人家滷个鹹菜
還有攤在禾埕曬个菜頭稂
哦 我所罣吊个你
鄰舍晡娘儕做月介雞酒香幾餳人
搒米冇搒出一莊又一莊細人个笑聲
你敢還記得有一個時代係食蕃薯籤過日
逐擺你問我心肝肚个該首詩
我斯像愛尋竇个鳥子
飛過一間又一間介屋簷唇
尾下 在拆撇个老屋對面停途
見愐著阿爹个钁頭
我斯像揢緊歸手牛眼樹下个泥團
喔 原來泥肚有雷公筋个根脈
揞在石駁孔肚乜硬硬愛鑽出嫩筍
毋好過問我心肝肚个該首詩
該係倒覆在我回憶底肚个疾
恁久以來盡想愛保留語言个回甘
毋過實在講乜毋知哪位所爭
細義勾出个逐句話
一隻音一隻音讀分你聽該下
已像鼻著有兜生菇臭餿撇个味瑞
該首詩
一半下又想愛你輒輒來問起
因致田坵犁過个泥堀又鬆又肥
所罣吊个你呵
試愐看一頭一頭个禾啊在風中哂哂嗦嗦
總係有一日會打出飽米个禾串
可比講你過問我心肝肚个這首詩
你敢知我有幾想愛替你再過讀一遍
一句跈緊一句
像鮮鮮河水一浪激過一浪流毋停

【食茶】
你目神底背个我
我目神底肚个你
這滿滾了
該斯兩皮嫩葉合一心
定定弓開
定定弓開

出味了
出味了

【揹帶】
這條揹帶
揹過當多人
一代傳過一代
細孲嬰貼緊背曩
恬恬睡快快大
揹帶絆緊阿姆个奶姑
斯毋驚肚屎會飫著
這條揹帶長又長
揹緊雨水同清風
揹緊梨園同田洋
乜揹緊日頭同月光
這條揹帶軟又軟
揹過山歌同笑聲
揹過目汁同汗酸
乜揹過人生行四方
你斯毋好嫌佢恁舊
你斯毋好嫌佢色目醜
該奶臊啊
係吾等發夢都想愛鼻著个味瑞

【斷烏介巷肚】
斷烏个巷肚
阿姆細聲同我講
過出去尞斯會分魍神牽去
該下還毋知好驚个我
長在對窗門个細縫
想愛看魍神生來麼个樣相
魍神一日無來
一年無來
幾下年毋知有來也無來
聽大人講夥房肚个阿叔打毋見咧
上屋个阿伯乜尋無人
做麼个無人愐著係分魍神牽去呢
臨暗時節
見親人吂轉夜
我斯會驚怕
該生像人形又像禽獸个魍神
毋知會對哪條斷烏个巷肚
目珠利利在該伏緊

 

了解更多請至秀威作家生活誌

至Google play 購買電子書

 

 

今日人氣:3  累計人次:318  回應:0

你可能感興趣的文章


登入會員回應本文

沒有帳號?